अमेरिका–भारत बढ्दो साझेदारीका बीचमा के अमेरिकासँग नेपालको स्वतन्त्र द्विपक्षीय सम्बन्धमा कुनै अन्तर आउन सक्छ ?
ह्वाइट हाउसको भान्सामा विदेशी अतिथिका लागि कोदो, मकैको सलाद र च्याउको परिकार रहेको विशुद्ध ‘भेज’ खाना विरलै पाक्थ्यो होला, तर गत असार ७ गते भारतीय प्रधानमन्त्री नरेन्द्र मोदीको मेनुमा त्यही थियो, भलै कूटनीतिक मेनु त्यति सादा थिएन ।
अमेरिकाले निकै महत्त्व दिएको, र भारतीयहरूले त्यसभन्दा हर्षबढाइँ गरेको मोदी भ्रमणको सामरिक सूची निकै आकर्षक देखिन्छ- लडाकु जेटको प्रविधि हस्तान्तरण, अत्याधुनिक ड्रोनहरूको आपूर्ति, भारतमै अमेरिकी सेमी–कन्डक्टरको उत्पादन, अन्तरिक्ष अन्वेषणमा सहकार्य आदि ।
